Archive | Netwerk24 RSS feed for this section

Hof hoor van band tussen Cobus Kellermann, Herman Pretorius

10 May

Author: Nellie Brand-Jonker 

Publications: Netwerk24

Date Published : 10 Mei 2015

Die baasbrein agter Suid-Afrika se reuse-RVAF-piramideskema, wyle Herman Pretorius, word in hofstukke in Guernsey oor beleggingskemas genoem waarby die Kaapse batebestuurder Cobus Kellermann betrek word.

In die hofstukke daar word gesê van die hoogs riskante Suid-Afrikaanse beleggings wat Kellermann as ’n portefeuljebestuurder van ’n Guernsey-fonds gemaak het, was in maatskappye van Basileus Investments.

Wie was Basileus Investments?

Basileus Investments het in 2012 die nuus gehaal toe sy uitvoerende hoof, Julian Williams, in sy kantoor in die middestad van Kaapstad deur Preto­rius doodgeskiet is. Pretorius het homself daarna geskiet.

Volgens die hofstukkie is die JSE-genoteerde BK One gestig as ’n voertuig waardeur kapitaalinspuitings gemaak kon word om die Basileus-verwante maatskappye te ondersteun.

Paul Yabsley, die ondersoeker van Guernsey se finansiële owerheid, skryf in die hofstukke dat die Strategic-fonds in ’n stadium onder leiding van Kellermann direk en indirek deur fondse van Mauritius beleggings en lenings aan Basileus en sy verwante maatskappye gemaak het.

Die hofstukke verduidelik ook hoe die Strategic-fonds in wese R71 miljoen geleen het aan ’n maatskappy om ’n plaas in Helshoogte te ontwikkel en daarna weer R72 miljoen opgedok het om die plaas te koop – om dié lenings aan homself terug te betaal, volgens Yabsley.

Yabsley verwys na die skietvoorval op 26 Julie 2012 toe Williams deur Pretorius geskiet is, glo oor ’n dispuut oor geld wat Basileus se maatskappy AV Alloy aan hom moes betaal het.

Daar is berig dat dié geld deur Pretorius gebruik is om die beweerde piramideskema te finansier. Dit het later aan die lig gekom dat beleggers R2,2 miljard in Pretorius se Relative Value Arbitrage Fund (RVAF) belê het.

Belangebotsings?

Die hofstukke verwys ook na die hoogs omstrede transaksie wat Kellermann gedurende die week van die skietvoorval met BK One-aandele uitgevoer het om die aandele te verkoop. Kellermann was in daardie stadium die eienaar en portefeuljebestuurder van Ankh Analytic wat ’n Ankh-fonds bestuur het wat BK One-aandele besit het.

Ná die skietvoorval het BK One se aandeelprys skerp geval.

Volgens Yabsley is die BK One-aandele aan die Strategic-fonds verkoop teen die prys waarop dit op 25 Julie 2012 verhandel het.

Daar is geen bewyse tot die Guernsey finansiële kommissie se beskikking dat Kellermann in daardie sta­dium enige poging aangewend het om die skietvoorval van Pretorius en Williams en die negatiewe uitwerking wat dit waarskynlik sou hê op die BK ­One-aandele te openbaar nie, voer Yabsley aan.

“Alle aspekte van hierdie transaksie is hoogs twyfelagtig. Sonder twyfel is die Ankh-fondse se belange in BK One verkoop tot voordeel van beleggers in die Ankh-fondse en tot nadeel van die beleggers in die Strategic-fondse.

“Kellermann het groot belangebotsings gehad in alle dele van die transaksie met sowel Ankh as die Strategic-fondse.”

Yabsley sê Kellermann moes al in Junie 2012 bewus gewees het van die bewerings oor die bedrieglike beleggingskema van Pretorius.

Kellermann het onlangs aan Die Burger gesê die opdrag om die BK One-aandele te verkoop, is gegee ’n dag voordat Williams geskiet is. Volgens hom het dit verband gehou met die administrateur van Ankh se opdrag om sekuriteite te verkoop om likiditeit in die fonds te kry.

“Die vereffening van die aandele vind ’n dag of twee ná die transaksie plaas. Daar is niks ongerymd daaraan nie.”

Volgens hom is dit deur die Raad op Finansiële Dienste ondersoek, wat gelukkig was met die antwoorde.

 

Dienstekommissie onthul: Ponzi-manne ‘het lang geskiedenis’

6 May

Author: Marelize Barnard

Publications: Netwerk24

Date Published : 6 Mei 2015

KAAPSTAD. – Wat het die Ponzi-bedrieër wyle Herman Pretorius, die man wat hy doodgeskiet het, Julian Williams, en die beleggingsbestuurder van Welgemoed, Jacobus Kellermann, met mekaar te doen?

’n “Lang geskiedenis” – as dit van die Finansiële Dienstekommissie van die Britse eiland Guernsey (GFSC) afhang.

Die skietery waarin Pretorius op 26 Julie 2012 eers vir Wil­liams en daarna homself geskiet het, is in die Guernsey-hooggeregshof vir die eerste keer in openbare hofdokumente aan internasionale aandeletransaksies gekoppel.

Kellermann, wat net soos Pretorius spogeiendom in Welgemoed aangeskaf het – en ook soos Pretorius ’n voorliefde vir vinnige sportmotors het – word by dié aandeletransaksies betrek. Kellermann en sy sakevennoot, David Cosgrove, is die afgelope twee maande al hoe meer in die nuus oor die beleggingsfondse waarby hulle in veral Mauritius en ook Guernsey betrokke is en ondersoeke na hul betrokkenheid by die bestuur van internasionale beleggingsfondse.

Die Pretorius-skietery:

Pretorius en Williams se skietdood was ’n dag nadat Kellermann betrokke geraak het by die verkoop van 1,4 miljoen aandele in die beleggingsmaatskappy BK One, wat gebruik is as beleggingsmedium om beleggers te kry om in maatskappye te belê wat aan die Basileus-groep behoort het.

Pretorius se beleggers het in een van die Basileus-maatskappye, AV Alloy, belê. In Pretorius se poging om sy Ponzi-skema geheim te hou, het hy R40 miljoen aan Williams geleen om aan sy beleggers uit te betaal en daardeur te probeer voorgee alles gaan goed.

Williams en Pretorius het hieroor gestry, wat klaarblyklik tot die skietvoorval gelei het.

Op dieselfde dag van die skietvoorval is 1,4 miljoen aandele in BK One verhandel. Dit is aandele wat aan Ankh behoort het, ’n beleggingsfonds wat deur Kellermann bestuur is.

Die verkoop van aandele:

Die Ankh-aandele in BK One is volgens die Guernsey-hofstukke deur nog ’n entiteit, Citygate (’n maatskappy in Mauritius wat deur Kellermann en Cosgrove bestuur is), aan nog ’n entiteit, Strategic Cells, verkoop. Die verkoopsprys was glo teen die waarde van die aandele soos vasgestel die dag voor die skietvoorval.

Intussen het die skietvoorval ’n “dramatiese” impak gehad op die waarde van die BK One-aandele. “Alle aspekte van die transaksie” kan volgens die hofstukke voor die Guernsey-hooggeregshof op hoogste vlak bevraag-teken word. Daar word aange-voer dat Kellermann in ’n groot-skaalse belangebotsing was omdat hy namens Ankh én Strategic Cells opgetree het.

Kellerman het volgens die bewerings van die Guernsey Finansiële Dienstekommissie nie die nodige inligting van die skietvoorval of die moontlike negatiewe nagevolge wat dit op die BK One- en Basileus-aandele sou kon hê aan die relevante betrokkenes verklaar nie.

Wat sê Kellermann?

Kellermann het op 25 Maart aan Die Burger gesê hy was as raadgewer betrokke by ’n maatskappy wat genoteerde BK One-aandele gekoop het. Die beleggingspan het dit verkoop na aanlei-­ding van ’n versoek van die besturende maatskappy om kontant in die portefeulje te verhoog.

Kellermann en Cosgrove het gister deur hul regsverteenwoordiger, Werksmans-regsfirma, by navraag oor die bewerings in die Guernsey-hofaansoek gesê hulle gaan vir eers nie verder kommentaar lewer nie.

Bedrog: Enorme opbrengs altyd ‘n rooi vlag

24 Mar

Author: Hanlie Stadler

Publications: Netwerk24

Date Published : 24 Maart 2015

BESKERM JOUSELF SÓ TEEN PONZI-SKEMAS, ANDER BEDROG

Moenie belê in iets wat jy nie verstaan nie, moenie jou ore om die braaivleisvuur uitleen nie en moenie probeer vinnig ryk word nie. Dít is kortom die beste maniere waarop jy keer dat jy die slagoffer van ‘n Ponzi- of ander bedrieër word. Luister ook na die klankgreep wat ‘n Ponzi-skema maklike verduidelik.

Moenie belê in iets wat jy nie verstaan nie – selfs al ís dit ’n goeie belegging. As jy dit nie verstaan nie, weet jy nie wat die risiko van ’n belegging behels nie.

Moenie luister na kroegpraatjies nie – iemand wat besig is om geld te maak, kan beslis nie vir jou ’n objektiewe mening gee nie. Dis dalk nou net die ou wat nog betyds in ’n Ponzi-skema belê het om enorme opbrengste te behaal. Jy’s dalk die arme drommel wat belê wanneer die skema in duie begin stort.

Maar die belangrikste van alles is: Moenie onrealistiese verwagtinge oor opbrengste hê nie.

Dít is kortom die raad van Gavin Came, voorsitter van die komitee oor finansiële beplanning van die vereniging vir finansiële tussengangers van Suid-Afrika (FIA), na aanleiding van die nuutste beweerde bedrogspul wat oopgevlek is in die Suid-Afrikaanse beleggingswêreld.

’n Geoktrooieerde rekenmeester van Welgemoed in Kaapstad, Cobus Kellerman, word betrek by ’n beweerde Ponzi-skema wat via Mauritius sake gedoen het en na verneem word R200 miljard se bates onder bestuur het. Kellerman het na bewering bande gehad met Herman Pretorius, wat homself om die lewe gebring het toe sy bedrog aan die lig gekom het.

Duisende mense verloor jaarliks miljarde rande – dikwels hul aftreegeld – in twyfelagtige en bedrieglike “beleggings”. Hoe keer jy dat jy ’n slagoffer raak?

Lees Meer